2Cor 6 | KYG | STEP | Lagaemo Goti'e'mo magokepi lokaeta ali'ya'amo ne'aluna vaya'mogita hutae'mo, Goti'a fiku hapa maeno ne'apamiya kava'amo fiku o'alitapa agetapa alagepa huta agetetapa aliyo, huta aukaya huta nelapatone.

2 Corinthians 6

1 Lagaemo Goti'e'mo magokepi lokaeta ali'ya'amo ne'aluna vaya'mogita hutae'mo, Goti'a fiku hapa maeno ne'apamiya kava'amo fiku o'alitapa agetapa alagepa huta agetetapa aliyo, huta aukaya huta nelapatone. 2 Ani kavatefe'mo huno'ae'mo,

Fiku hapa mae'na ne'apamuva afina'mo gekamo afi'nove. Apakufamo ali'na kati'na ne'apatova afina'mo kaha mae'nove,
huno hu'niye. Afiyo, hemenimo vaya'mo fiku hapa maeno ne'apamiya afina'mo hane'niye. Afiyo, hemenimo vaya'ai apakufamo alino katino ne'apateya afina'mo hane'niye. 3 Ali'yatie'mo hu'a faipa hu'a olatesayafe'mo vaya'ai apaiyafi'mo hapaesiya ya'mo alita no'malona'monanafa 4 Goti ali'ya'amo alagepa hu'a ne'aliye, hu'a lagesayafeke'mo alu alagepa kava alu alagepa kava'mo nehune. Lagaemo o'ataleta atafauta alagi huta maige hanageke ya'mo alige kafu huge kana ya'mo alige huta mai'none. 5 Vaya'mogi lamagige kalavusi hu'a latege apano ae'a apavamusa gemo hu'a latege nehae. Lokiya ali'ya'mo ne'alitae'mo alaga lahaege lau okalege ne'ya'mo o'nege huta mai'none. 6 A'ne'aitegamo lokiya yaveyave kava'mo huge afiteta ageta aeto huge yuna laipamo kalige falu laipamo kalige alita lao ya'mo huge Aote Auneme'aleti kava'mo huge laipafati'mo lahau layamopafi'mo lahauge huta mai'none. 7 Lama gemo huge Goti himamu'aleti'mo huge huta alagepa kava'mo huta mai'none. Fatago kavateti'mo kame hisuna ya'mo lamaga layapi'mo alige hogo layapi'mo alige huta mai'none. 8 Mago vaya'mogi lagitile'mo ali'a afepi nelatae. Mago vaya'amogi hu'a faipa hu'a nelatage'a mago vaya'amogi ala lagitimo nelamiye. Mago vaya'mogi hu'apae'mo, apakesamo nefaiya vaya'mo mai'nae, hu'a nehaya'monanafa lama gemo vaya'mo mai'none. 9 Ina agufa vaya'mo mai'nae, hu'a hute'a nolagaya'monanafa Goti'a lage'niye. Falisuna agufa kava'mo nehutae'mo lageyo, afa'a mai'none. Lamagi'naya'monanafa alagi kamiti olamagi'nae. 10 Laipamo'mo kana nehiya'monanafa muki afina'mo lamogaga ne'aune. Kagemi yatimo ohane'niya vaya'mo mai'nona'monanafa alopa kagemi ya'apimo alita ne'apamunage'apae'mo alopa kagemi ya'e vaya'mo nehamalae. Ma mopafi ya'mo o'ali'nona'monanafa muki ya'amo ago ali'none.

11 O Kolitiyani vaya'mogitapae, huta, muki lagesamo afi'nona ge'amo huta afole aita lapa pai'none. Laipa lagesafi'mo lahau'niya kava'mo mago'e huta ago alita lapami'none. 12 Laipamo atafauta o'ateta alita lapami'nona'monanafa lapaipamo olamitapa atafautapa ate'nae. 13 Mafa'ne'nimogitapae'mo, hu'na, lapakae'e'mo anonatilefe'mo lapaipamo lamiyo.

Goti mono no'amo mai'nae, huno hu'niya gemae

14 Alu agufa'e afu'e alu agufa'e afu'e'mo magokepi lokae'ana ali'ya'mo alisa'afe'mo yosaleti'mo ki'a anatafau'ana no'anatae. No'anataya kava hutapa apakesa afi'a fatago osu'naya vaya'e'mo magokepi lokaeta ali'ya'mo o'aliyo. Haiya kava hu'ana alagepa kava'e hosu kava'e'mo afalu afalugana hu'ana magokepi lokae'ana hanega'ae. Haiya kava hu'ana ha le ya'e hani ya'e'mo afalu afalu hu'ana magokepi lokae'ana hanega'ae. 15 Kalaisi'e Satani'e'mo magoke anaipa kali'ana ne'mai'afiye. Ha'ao. Apakesa afi'a fatago nehaya vaya'ai kava'apimo alu kava'mo hane'nigeno apakesa afi'a fatago osu'naya vaya'ai kava'apimo alu kava'mo hane'niya'mofe'mo magoke hetamafati'mo o'aligune. 16 Haiya kava huno alo nehaya aigofe goti'apimogi Goti aote ha le mono nopi'mo hanegae. Alu ya alu ya'mo hane'naya'mofe'mo ohanegae. Lagaemo afa'a ne'maiya Goti aote ha le mono no'amo mai'nona'mofe'mae. Goti'a ani kavatefe'mo huno'ae'mo,

Nagaemo apakaepi'mo mai'ne'na apakae folagapi'mo umenitata huguve. Goti'apimo'namo maisuge'a vaya'nimo maigae, huno hu'niye. 17 Hu'niya'mofe'mo Ala kava ne'mo'a huno'ae'mo, Apakae folagapati'mo apataletapa uta lapaote maiyo. Hosu yate'mo ame o'ali'nige'nao lapavalegauvanagi. 18 Afotapimo'namo maisugetapa mafa'ne a'mafa'ne'nimo maigae, huno Ala kava ne'mo ayamufa'age vekamo'a ani gemo hu'niye,
huno hu male'niye.